Аз 5 то 8 июни соли 2024 Форуми байналмилалии иқтисодии Санкт-Петербург доир гардид. Ҷумҳурии Тоҷикистонро дар Форуми мазкур муовини якуми Сарвазири Ҷумҳурии Тоҷикистон Холиқзода Ҳоким бо ҳамроҳии муовини якуми вазири рушди иқтисод ва савдо, раиси Кумитаи рушди сайёҳӣ, муовини раиси Кумитаи давлатии сармоягузори ва идораи амволи давлатӣ ва Консули генералии Ҷумҳурии Тоҷикистон дар шаҳри Санкт-Петербург, муаррифӣ карданд.      

Ҳайати Ҷумҳурии Тоҷикистон дар ҷаласаҳои пленарӣ ва панелии Форуми байналмилалии иқтисодии Санкт-Петербург фаъолона ширкат намуда, дар ҳошияи он мулоқоту вохӯриҳои судманд бо иштирокчиёни он доир намуданд.

Ҳамин тавр, дар доираи Форум муовини якуми Сарвазири Ҷумҳурии Тоҷикистон Ҳ. Холиқзода бо муовини якуми Сарвазири Федератсияи Россия Д.В. Мантуров, Вазири рушди иқтисоди Федератсияи Россия М.Г. Решетников, Вазири сохтмон ва хоҷагии манзилию коммуналӣ И. Файзулин ва Раиси Ҷумҳурии Тотористон Р.Н.Минниханов вохӯриҳо анҷом доданд. Дар рафти он ҳолати имрӯза ва дурнамои муносибатҳои дуҷониба табодули афкор сурат гирифта, таваҷҷуҳи хосса барои амалии бандҳои протоколи комиссияи байниҳукуматии Тоҷикистону Россия оид ба ҳамкории иқтисодӣ равона гардиданд.

Инчунин, барои густариши соҳаи бонкӣ вохӯриҳои муовини якуми Сарвазири Ҷумҳурии Тоҷикистон Ҳ. Холиқзода бо роҳбариати “Алфа-Банк”, “Банк ВТБ” ва “СберБанк” баргузор шуданд.